PAGKATAPOS mag-grocery ay inihatid din kaagad ni Liam ang nobya at ang kaibigan nitong si Luisa pabalik sa penthouse. Ligtas naman silang nakauwi, ngunit muli siyang nagpaalam sa mga ito na aalis. Hindi naman siya inusisa ng nobya dahil abala ito sa kung anong ginagawa nila ni Luisa. Sinamantala niya naman na ang pagkakataong iyon upang bumalik sa isang mall, hindi para mamili ng kung ano kundi para bumili ng singsing. Nahihiya siyang inalok ang nobya ng kasal nang wala man lang siyang hawak na singsing upang ibigay rito. Hindi niya tuloy magawang tanggapin ang naging tugon nito kaya naman nagpaplano siyang muling alukin si Piper, ngunit sa ikalawang pagkakataon ay sa harap na ng mga taong malapit sa kanilang buhay at sisiguraduhin niyang sa isang romantikong pagkakataon niya iyon gagawin.
