REBIRTH SERIES #2: The Divine Doctor

I MISS YOU... YING

Napakunot na lamang ang noo ni Li Xie nang marinig niya na mayroong maingay sa labas ng kanilang coffee shop. Noong una ay akala niya na isa lamang ito sa mga mamimili na nagrereklamo at kaya na itong lutasan ni Wang Wei ngunit nang may kumatok sa kaniyang silid at sinabing ang babaeng nagwawala ay si Li Xie ang kaniyang nirereklamo ay tumaas na lamang ang kaniyang kilay.

'Hindi ko maalala na may nakaaway akong ganitong babae,' sambit ni Li Xie sa kaniyang isipan.

Nag-asikaso na lamang muna si Li Xie ng kaniyang sarili at hinyaan na lamang muna niya ang babae na magreklamo at magsisigaw sa labas ng shop. Hindi naman ito ganoon kaimportante kay Li Xie para magmadali siya kaya naman mas lalong nainis ang babaeng nagrereklamo.

"Ano?! May balak pa bang lumabas ang babaeng 'yun o natakot nang magpakita rito?!" sigaw ng babaeng nagrereklamo.

Naririnig man ito ni Li Xie habang pababa siya ng ikalawang palapag ay hindi pa rin siya nagmadali. Nang makita naman ng mga tao na nasa unang palapag si Li Xie na elegante at hindi nagmamadaling bumaba ay halos matawa na lamang sila at hindi alam kung maaawa ba sila sa babae na nagwawala o matatawa.

Unang una, halatang walang pakialam si Li Xie sa nirereklamo ng babae. Pangawala, pinapakita lamang ni Li Xie na hindi importante ang babaeng nagrereklamo.

"Ang aga aga ang lakas ng bibig mo. Wala na atang tatalo pa sa 'yo dahil abot hanggang sa bukana ng central market ang boses mo," walang emosyon na sambit ni Li Xie at napatingin ang lahat sa kaniya.

May takip man ang kaniyang kalahating mukha ay hindi pa rin naman maipagkakaila na may magandang mukha ito. Bukod sa kanilang hinala na magandang mukha ay talagang bumagay rin sa kaniyang galaw ang pagiging elegante niya mula ulo hanggang paa. Isa rin sa dahilan kung bakit hindi nila maiwasan ang hindi mapatingin kay Li Xie ay dahils a awra na mayroon siya sa kaniyang paligid. Pakiramdam ng lahat na kapag hindi nila binantayan ang kanilang sarili at nariyan si Li Xie ay mamamatay sila.

Ang ganitong takot ay hindi kaagad basta basta nararamdaman ng mga tao sa central market at maliban sa ika-siyam at ika-walong prinsipe ng imperyo ay hindi na nila maramdaman ang ganitong pakiramdam.

"Ikaw! Ikaw ang babaeng nakausap ng anak ko hindi ba?!"

Kumunot naman ang noo ni Li Xie. "Anak mo? Sino?"

"Ang anak kong lalaki! Ikaw ang kumulam sa kaniya! Anong ginawa mo sa anak ko!"

Mahina naman na natawa si Li Xie at saka siya nag-krus ng braso. "Nagpapatawa ka ba?" natahimik ang lahat nang marinig nila ang boses ni Li Xie dahil sa lamig nito. Bigla naman nakaramdam ng takot ang babeang nagrereklamo. "Una sa lahat, wala akong pakialam sa kung sinong lalaki sa paligid. Bakit? Dahil mayroon na akong mapapangasawa. Pangalawa, hindi ako isang warlock. Magic user ako at wala sa kakayahan ko ang curse. At higit sa lahat, hindi ko kilala ang anak mo."

"Si Aden! Si Aden ang anak ko!"

"Oh, si Aden." Ngumiti naman si Li Xie nang mapagtanto niya kung sino ang babae na nasa harapan niya. "Ikaw pala ang kaniyang ina..." tumigil si Li Xie at tinitigan ang babae na nasa harapan niya. "Una sa lahat, kaya nagpunta si Aden sa akin ay dahil para mailigtas ang kaniyang ama. Pangawala, hindi ako ang taong hinahanap mo."

Tumawa naman ang babae na nasa harapan ni Li Xie na ina ni Aden.

'Wow, ate. Kung tumawa parang baliw ah.' Nakangiwi na sambit ni Li Xie sa kaniyang isipan.

Hindi niya akalin na kulang na lamang ay mabaliw ang babaeng ito. Napapaisip tuloy si Li Xie kung bakit pa nito gustong maging asawa ang ama ni Aden gayong ang talagang gusto niya makasama ay ang kapatid ni Huanxi.

"Heh! Alam ko na ikaw iyon! Ang babaeng nanggagamot sa asawa ko!"

"Okay ka lang, ate?" tanong ni Li Xie at hindi alam ng mga tao sa paligid kung nagtatanong ba si Li Xie dahil nag-aalala ito o dahil sa nang-aasar ito. Hindi nila alam dahil hindi nila makita ang buka ng bibig ni Li Xie. "Ako? Manggagamot? Sa pagkakaalam ko ay kilala at nakita na ng anak mo na si Aden ang mukha ni Doctor Lx, bakit mo pa rin pinagpipilitan na ako ito?"

"Dahil ikaw lamang ang nakakakilala sa kaniya!"

'Sharp. Kung pwede ko lang patayin ang babaeng ito sa oras na ito e,' inis na sambit ni Li Xie sa kaniyang isipan.

"Ano ngayon kung ako lang ang nakakakilala sa kaniya? Wala akong kakayahan na mayroon siya at alam ito ng lahat. Hindi ko alam kung nasaan ang isip mo. Hindi ba ikaw rin naman ang may gusto na mawala ang asawa mo?" walang emosyon na sambit ni Li Xie.

Napasinghap naman ang lahat at hindi makapaniwala sa sinabi ni Li Xie hanggang sa mayroong humihingal at sumigaw.

"Mother Jin!"

Napatingin ang lahat sa pinanggalingan ng boses at nakita nila si Aden na hinihingal. Halatang tumakbo ito ng malayo.

"Aden..."

"Anong ginagawa mo rito?" may diin na tanong ni Aden.

Simula noong nabantaan si Aden sa nangyayari sa kaniyang ama ay lumayo ang kaniyang loob sa babaeng tinuring niya na kaniyang pangalawang ina. Hindi niya alam kung bakit ito nangyari gayong noong una naman niya itong makilala at pumasok sa pamilya nila ay mabait ito at talagang mahal ang kaniyang ama.

Natatakot si Aden na baka ang lahat ng iyon ay kasinungalingan lamang.

"Aden! Hindi ba sinabi ko sa 'yo na huwag ka nang magpunta rito?! Sinabi mo na sa akin na-"

"Mother Jin! Walang kinalaman si Miss Muxie sa lahat! Sa kaniya lamang nanghingi ng tulong dahil sa siya man lang ang nakakaalam kay Doctor Lx!"

"Pero dahil sa doktor na iyon hindi ko magawang makita ang iyong ama!"

"Para lamang iyon sa proteksyon! Walang ibang makakakita sa kaniya kundi ako man lang!"

Napasapo na lamang si Li Xie ng kaniyang noo dahil sa eksena na nasa kaniyang harapan. Sinabihan ni Li Xie si Wang Wei na magpatuloy sa trabaho at saka ito humarap kay Aden.

"Aden, masyado nang nakakaabala ang iyong ina sa aming negosyo. Maari mo na bang dalahin at iuwi ang babaeng ito?" walang emosyon na sambit ni Li Xie.

Sa hindi malamang dahilan ay kinilabutan naman si Aden ngunit nagawa pa rin naman niya na tumango at sumunod sa sinabi ni Li Xie. HIndi niya gustong magalit si Li Xie at mas lalong hindi niya gusto na maging kaaway si Li Xie. Hindi niya ito gustong makaaway dahil alam niya na hindi niya kakayanin na maging kaaway ang isang babae na kagaya ni Li Xie at higit sa lahat, kaya ayaw niya maging kaaway ito dahil gusto niya na mapalapit dito.

"Ako na bahala rito," mahina na sagot ni Aden kay Li Xie.

Walang pasabi na lamang na pumasok si Li Xie sa loob ng gusali at nagbalik sa kaniyang silid. Dahil doon ay kaagad naman na kumalat ang balita tungkol kay Li Xie na mayroon ng mapapangasawa kaya naman ang mga lalaking naghahanda upang magsabi kay Li Xie ng kanilang nararamdaman ay kaagad na umurong. Kilala nila ang ugali ni Li Xie sa maikling panahon na nakita nila ito. Para sa kanila, si Li Xie ang tipo ng babae na walang pakialam sa iba kapag nagmahal na.

Bumuntong hininga si Li Xie at bumagsak sa kaniyang higaan. "Hindi ko akalain na ipapakalandakan ko ang ganoong bagay..." mahinang bulong ni Li Xie sa kaniyang sarili.

Nang ipikit ni Li Xie ang kaniyang mata ay tanging nakangiting mukha lamang ni Lin Xui Ying ang nakikita niya.

"I miss you... Ying..."