“SIGURADO KA NA ba, Eva? Sayang naman. Ang sipag mo pa naman. Pero kung ‘yan ang ikakaasenso mo at ng mga kapatid mo, aba’y hindi namin hahadlangan ‘yan. Pero ang tanong, sure ba ‘yang trabaho na ‘yan? Kalaki nga naman ng suweldo, nakaka-engganyo,” ani Aling Charing nang magpaalam ako.
Ang hirap magdesisyon. Pero gusto ko talaga magtapos ng pag-aaral. Iniisip ko nga kagabi, malaki ang maiipon ko kung sakaling sa matanda ako magtrabaho. Alalay daw nito, pero hindi ko alam ang sakop ng trabaho na ‘yon. Para sa pangarap ko na makapagtapos, kahit ano pa ‘yan, kakayanin ko.
“Opo, Aling Charing. Pasensya na po, kailangan ko po kasi talaga ng malaking kita.”
“Ayos lang. Naiintindihan ko naman. Sana nga suwertehin ka.”
“Oo nga po. Marami pong salamat. Hinding-hindi ko po kayo makakalimutan.”
