LORABEL
Wala pang labing-limang minuto nang may pumaradang sasakyan sa tapat ng bahay. Tumunog rin ang cellphone ko at nakita ko ang unregistered number sa screen. Agad ko itong sinagot dahil sa tingin ko ay ito na ang GrabCar na kinuha ng kasama ni Uncle Zarex para sa akin.
“Miss, nandito na po ako sa tapat ng bahay mo,” sabi agad ng lalaki mula sa kabilang linya.
“Sige po, lalabas na ako,” sagot ko.
Agad kong dinampot ang wallet ko at mabilis na lumabas ng pintuan. Patakbo akong lumabas sa gate at lumapit sa nakaparadang sasakyan.
Nagulat ako nang makita ko ang itim na kotse dahil hindi ko akalain na magarang sasakyan pala ang susundo sa akin.
“Kuya, GrabCar po?” agad kong tanong sa driver bago buksan ang pintuan ng kotse dahil gusto ko munang makasiguro na tama ang sasakyan ko.
