Maingat niyang isinuot ang isang manipis na cotton na sando kay Alexander matapos niya itong malagyan ng polbo sa likod. Pasado alas-otso na ng gabi at nasa loob na sila ng kanilang maliit na silid.
Karaniwan, ganitong mga oras ay tulog na ang kanyang anak. Naiba lang ngayong gabi sapagkat naglaan pa ito ng ilang saglit para makipaglaro sa Lolo Orlando nito. Kanina kasi pagkauwi galing sa talipapa ay may dalang laruang kotse ang dalawa. Ayon sa kanyang tiyuhin ay nagpakita daw 'di umano ng interes ang bata kaya binili na nito ang naturang laruan.
Madalas ay mas naii-spoil ng mag-asawang Nimfa at Orlando si Alexander. Mas ang mga ito kasi ang madalas kasama ng kanyang anak mula nang magtrabaho na siya. Nabibilhan niya rin naman ang bata, maging si Kristy na rin, ng ilang kagustuhan ng mga
