AIDAN
“Bakit ngayon ka lang?” Ito agad ang sumalubong sa akin nang pumasok ako sa silid ni Lolo Sabby.
Mukha naman siyang malakas, malayo sa sinabi ni Sofie na naghihingalo na raw ang matandang kaharap ko at nakaratay. Minsan talaga, exaggerated kung magbalita ang babaeng iyon, manang-mana sa matandang kaharap ko.
“Tinatanong kita, Aidan, bakit ngayon ka lang at saan ka na naman naglalagi?” tanong sa akin ni Lolo Sabby.
“Ah, ma-traffic kasi, Lolo–”
Hindi ko natapos ang sinasabi ko nang tumama sa katawan ko ang tungkod na hawak ni Lolo Sabby.
Kahit may edad na, malakas pa rin humampas ang matandang kaharap ko, pero hindi na lamang ako nagsalita at baka makatikim ulit ako ng baston.
“Magdadahilan ka pa, e, babae lang naman ang dahilan, kaya palagi kang late na animal ka!”
Umangat ang
