"Masisira lang ang pagkatao mo d'on, bes!"
Muntikan nang matakpan ni Kathleen Marissa Joy Suarez o KMJS for short ang dalawang tainga sa lakas ng tili na iyon ng bestfriend niyang bakla na si Rey Ted Katigbak o Reyted K for short, nang sabihin niya ang plano.
High school pa lang ay magkaibigan na silang dalawa. Kaagad silang nagkasundo dahil pareho silang binu-bully sa school dahil sa kakaiba nilang mga pangalan. Biro nga nila sa isa't isa, silang dalawa talaga ang itinadhana kung hindi lang bakla si Reyted K. Ngunit kapag ganoon, diring-diri na ang kaibigan ni KMJS. Lalaki kasi talaga ang gusto nito.
Simula nang dalhin si KMJS ng mga magulang niya rito sa Maynila ay si Reyted K na ang nag-iisang kaibigan niya. Kahit noong nasa Dumaguete pa lang sila ay wala nang gustong makipagkaibi
