ANIM na oras lang ang naitulog ni Maya at kahit antok pa’y napilitan siyang bumangon. Maingay na kasi sa labas at may nagbubumba ng poso. Paglabas niya ng kubo ay namataan niya si Yoshin na naliligo sa poso.
“Ang aga mo namang nagising,” aniya.
“It’s already five in the morning,” sabi nito. Nagbubuhos ito ng tubig sa ulo gamit ang tabo.
Tanging boxer na itim ang suot nito. Naaliw na siya at kinuhaan ng video ang binata. Pagkuwan ay nagluto na siya ng almusal nila. Binilisan niya ang kilos dahil nagmamadali si Yoshin. Atat na itong magsimula sa challenge.
Dumating na rin si Boyet at may dala na namang malaking supot ng pandesal. Wala itong pasok kaya makatulong sa kanila. Si Mang Ador na ang naglinis ng naararong lupa at pinatubigan na para maisabay na mataniman ng palay sa Sabado.
T
