Chapter Thirty Two
CALOY
HINAYAAN KO LANG muna siyang umuwi sa kanila. Mas mabuti sigurong bigyan ko muna siya ng oras para magpalamig at maging abala sa ibang bagay. Susunduin ko na lamang siya mamaya.
Kaya naman ang ginawa ko maghapon ay naglinis ng buong kwarto. Nagkiskis ng kubeta, nagbrush ng sahig ng banyo at nagpakintab ng tiles sa buong kwarto.
Inayos ko rin ang kama, nagsalansan muli ng mga damit na nakakalat sa cabinet at panghuli ay ang pagdedefrost ng refrigerator.
Napakaraming laman nito dahil sa kanyang mga pinamili na gulay at prutas, mga karne at isda.
Tinanggal ko na at itinapon ang mga ulam na hindi naubos at saka ko hinugasan ang mga lalagyan nito. Naging maluwag na ulit ang ref at naging maaliwalas tingnan. Nag-order din ako ng tubig dahil paubos na ang stock.
