"Doc, dumating na po ang inaasahan ninyong pasyente na si Juan Miguel Marquez."
Inangat ni Clark ang ulo para makita ang kaniyang assistant.
"Okay, Faye, papasukin mo na," aniya rito.
Itinigil niya ang ginagawang pagbabasa sa resulta ng CT scan ng kaniyang pasyente sa kaniyang computer monitor. Pinatay niya muna ito at pagkatapos ay tumayo para tunguhin ang kanilang filing cabinet. Hinanap niya mula roon ang mga folder na naglalaman ng medical condition at records ng kaniyang paparating na pasyente.
Isang buntong hiningang malalim ang pinakawalan ni Isabela. Nasa harapan na sila ng pinto ng opisina ni Clark. Ngayon ang araw na naka-set sila ng appointment para magkita. Sinabihan na siya ng assistant ni Clark na pwede na raw silang pumasok sa opisina nito.
Napakislot siya ng maramda
