Pagdating sa bahay, hilong-hilo na siya. Ni hindi nga niya magawang buksan ang pinto ng kotse. Narinig pa niya ang mabigat na pagbuntong-hininga ni Gavin bago bumaba ng kotse at malakas na sinara iyon.
Ewan naman niya kung bakit wala siyang lakas. Sa susunod, hinding-hindi na siya iinom.
"You're drunk!" galit na sita ni Gavin sa kanya nang buksan nito ang pintuan ng passenger seat.
"A little," nakuha niyang isagot, kahit obvious na lasing na lasing na siya.
"Sa susunod huwag kang iinom kung hindi mo kaya! At lalong huwag kang iinom kung hindi mo maipagtanggol sa mga manyakis ang sarili mo!" sermon nito sa kanya.
Mangangatwiran sana siya nang bigla siyang buhatin nito mula sa upuan ng kotse.
"Gavin!" tili niya nang umangat ang puwitan niya sa upuan. Mabilis niyang kinawit ang mga bra
