*****ANASIA*****
Medyo masakit na puson ang nagpagising kay Anasia. Nakangiwing napabangon siya. Umupo siya sa ibabaw ng kama habang nakasandal ang kanyang likod sa headboard. Kinapa niya ang kanyang puson at nang maalala niya ang anak niya sa kanyang sinapupunan ay dagling nilukuban siya ng takot.
“No, baby. Please stay with Mommy,” naiiyak na bulong niya habang hinahaplos ang kanyang impis pa na tiyan. Kinakabahan siyang nag-isip ng gagawin. Hindi niya tinangkang bumangon agad dahil baka mas makasama sa kalagayan ng kanyang anak. Pinakiramdaman niyang mabuti ang sarili at napagtanto niyang para siyang may dysmenorrhea.
Nakunot ang noo niya dahil naisip niya na hindi naman siya maselan kapag may buwang dalaw siya. ‘Tsaka imposible na dadatnan pa siya dahil siguradong buntis na siya.
