Makipagkita sana siya kay Emma ngunit hindi niya makontak ang babae, at ganun rin si Alexander, kaya tumuloy na lang siya sa mall at nanood ng sine. Popcorn lang at soda ang kanyang dinner ngunit hindi siya nakaramdam ng gutom.
Pauwi na si Meghan nang madaanan niya ang isang kainan ng mga street food kaya pumarada siya sa harap nito. Nang pumasok siya sa maliit na restaurant, may ilang grupo na kumakain at kumunot ang kanyang noo habang pinagmasdan ang uri ng pagkaing nasa mesa. “Ano ‘yon?” Tinanong niya ang lalaki na nasa counter.
“Tuslob buwa po, Miss.” Sumagot ang lalaki.
Muli siyang lumingon sa mga taong kumain at napansin niya na nag-enjoy naman ang mga ito sa paghalo-halo ng isang kumukulong ulam na nasa ibabaw ng stove. “Okay, isang order ng tuslob buwa at chicharong bulaklak.”
