"Tuwing kabilugan ng buwan, nahahati sa dalawa ang kanilang katawan. Madalas ay iniiwan nila ito sa kanilang bahay, kung minsan naman ay sa loob ng gubat. Nakatago sa dilim."
Muli ay nagkatinginan sila ni Soliman sa mga narinig.
"Ibig sabihin, kailangan kong mahanap ang kalahating katawan ng manananggal?" untag ni Soliman.
Tumango naman si Gado. "Kapag nakahiwalay ang itaas na parte ng katawan nito, magiging mahina ang kalahating katawan niya. Ito ang kailangan ninyong punteryahin. Magdala kayo ng maraming asin o bubog, ibuhos ninyo sa kalahati ng katawan ng manananggal. Sa ganoong paraan ay hindi na makababalik ang manananggal sa katawan niya."
Nakaramdam siya ng matinding kilabot sa mga sinabi ng lalaki. Tumango naman si Soliman. Tila iniisip nitong mabuti ang kailangang gawin.
"B-b
