ANG MGA fans ng CU ay patuloy na kinalampag ang venue nang tumawag ng time-out ang Flamers. Lamang ng siyam na puntos ang Ballers at may natitirang dalawang minuto na lamang sa laro. May kompyansa ngang nagsibalikan sa bench ng CU sina Ibañez, at si Coach Wesley ay hindi pa rin naman nagpakakampante at sinabihan niya ang mga ito na ubusin na ang oras kapag nasa kanila ang possession. Slow-pace ang gawin nila para mahirapan nang makahabol ang CISA sa kanila.
Kabaligtaran naman ito sa sinabi ni Coach Erik sa kanyang mga players. Mabilisang puntos ang kailangan nila ngayon lalo’t kakaunti na lamang ang oras. Kailangan niyang putulin ang momentum ng CU kaya siya tumawag ng time-out. Isa pa, isang sakit sa ulo talaga ang isang Karlo Ibañez. Mapipigilan nila ito, pero hindi sa lahat ng bagay.
