NAPANGITI si Zoe nang maalala ang araw na iyon. Ang araw na nagkaayos sila ni Ethan. Ang araw na mas pinili niyang magpatawad, umunawa at maging masaya kasama ang taong mahal niya.
Tama nga talaga ang kasabihan na intindihin muna ang sitwasyon bago humusga at magalit.
Pero kahit naman sino, mahirapang kontrolin ang emosyon kapag naunahan na ng galit. Ang mahalaga ay marunong kang tumanggap at umayos ng pagkakamali mo. Humarap at bumawi sa taong nasaktan mo.
Mabuti na lang, napakabait at napaka-understanding na tao ni Ethan. Kahit ano yatang pagkakamali ni Zoe ay kaya nitong intindihin at patawarin.
Kahit yata siya na ang pinakawalang kuwentang tao sa mundo ay kaya pa rin siyang mahalin ni Ethan.
"Why are you smiling?"
Napakisap si Zoe nang putulin ni Justin ang pagmumuni-muni niya.
