"Liar!" malakas na sigaw ni Zoe kay Lala. Siya ang unang nakabawi sa pagkabigla. Si Ethan kasi ay naguguluhan pa ring nakahawak sa ulo. "Kung totoong anak n'yo nga si Ethan Luis, bakit ngayon mo lang sinabi? Bakit hindi ka naghabol noong nalaman mong mayaman pala siya? O noong wala ako sa eksena at nasa New York ako with Gerard? O kaya'y tumutol noong kasal namin? Bakit ngayon kung kailan may sakit si Ethan at hindi pa niya totally naalala ang lahat?" Nanginginig ang kamay na dinuro niya ang babae. "Dahil ang totoo, gusto mong samantalahin ang sitwasyon niya para gumawa ng kasinungalingan. Tama, 'di ba?"
Sa halip na sagutin si Zoe ay tinawanan lang siya nito at muling hinarap si Ethan na hindi pa rin nakakabawi sa pagkabigla. Parang pinag-aralan muna ni Lala ang reaksiyon ng lalaki bago i
