ANG buong akala ni Jared, ang pagkahuli nila sa dalawang drug lord ang simula para matapos na ang pagkalat ng droga sa bayan nila. Pero nagsisimula pa lang pala ang totoong laban. Dahil nang sumunod na araw lang ay nagulat si Jared nang mabalitaan niyang nakalaya ang dalawang nahuli nilang drug lord dahil kulang daw sa ebidensiya.
"Sir, paano pong naging kulang tayo sa ebidensiya?" sumbat ni Jared sa kanilang Hepe sa pinipigil na galit. Parang gusto niyang magwala pero pinipigilan lang niya dahil sa paggalang niya sa kaharap. Simula pa naman nang iwanan siya ni Jheann ay umiksi na ang pasensiya niya at nagiging mainitin na ang ulo niya. "Isang attache case ng shabu at ecstasy ang p-in-resent namin sa husgado. Kulang pa 'yon? Joke ba 'to?"
"Iyon ang desisyon ng nakataas, Kapitan. Wala na
